O colectivo nace a partir da proposta que xurdiu co mesmo nome en Ponte Caldelas e que pretende espallarse e construír unha rede de proxectos similares que cooperen entre si cun obxectivo común: a reforestación forestal do monte con especies autóctonas.
Artículo de la Página Original [valminortv.com]
Detalles de «Rexeneración Forestal Autóctona Val Miñor»
• Somos un grupo de xente veciña do Val Miñor que nos organizamos libremente para dar unha resposta coordinada á desfeita da última vaga de lumes e á situación dos montes.
O colectivo nace a partir da proposta que xurdiu en Ponte Caldelas, «Rexeneración Forestal Autóctona». Aínda que somos independentes e autónom@s no Val Miñor, mantemos comunicación e cooperamos con este proxecto con intención de traballar en rede, para facilitar e compartir experiencias, coñecementos e posibles actividades.
• Somos un grupo horizontal e participativo de xente que ten como obxectivo axudar á protección e rexeneración das zonas afectadas polos lumes, pero tamén fomentar un cambio de mentalidade con respecto á xestión dos nosos montes, baseada en criterios medioambientais e no ben común, na protección do territorio, na recuperación dos ecosistemas, e non tanto na «produtividade», aínda que entendemos que, de xeito racionalizado e consciente, temos que ter en conta a realidade no que respecta ás necesidades de consumo e mantemento dos montes, ante isto temos o convencemento de que poden ser xestionados de xeito sostible e á vez respectuoso co medio.
• Pensamos que as actuacións das institucións son lentas e ás veces insuficientes ou ineficaces. Que hai moitos intereses polo medio neste sector que fan que as administracións se perdan en debates políticos e legais que nos arredan dos obxectivos: Queremos o monte, queremos reforestalo e recuperar os nosos bosques autóctonos e o que traen con eles: animais, plantas, auga, biodiversidade, cultura propia…
• Estamos abertas as proposicións das CCMM, propietarixs forestais e outras partes implicadas, e ofrecemos a nosa colaboración para diversas accións: axuda en accións de protección e rexeneración do solo; recollida, sementeira e plantación de árbores e arbustos autóctonos; presentación de proxectos alternativos de xestión forestal; organización de eventos informativos, educativos, lúdicos, busca de información técnica con persoas expertas,…
• Por iso decidimos tomar a iniciativa e poñernos en contacto directo c@s propietari@s dos montes, tanto individuais como comunidades veciñais, para valorar as posibilidades de actuación directa no terreo, así como propoñer outros xeitos de intervención: educativa, informativa, legal, participación cidadá…, afondando nas raíces dos problemas e procurando solucións.
Se queres formar parte envíanos un correo electrónico a reforestacionvalminhor@gmail.com
